By: Joshua Kenneth Anas | December 5, 2022
Nagtukod sang Avian Influenza Response Team ang lokal nga gobyerno sang Roxas City kasunod sang nabalhag nga kompirmado nga kaso sang Avian Influenza Virus Type A (IVA), Sub-Type H5N1, ukon kilala nga Bird Flu sa Barangay Cagay.
Ini ang sandig sa Executive Order No. 40 nga gin-isyu ni Mayor Ronnie Dadivas.
Ang nasambit nga hubon ang ginakatapu-an sang Department of Agriculture, Provincial Veterinary Office kag mga opisyales sang natungdan nga barangay.
Bilang panguna nga lihok, gin-dispose kag ginlubong na sang hubon ang kapin 126 ka mga layer hens, native chieckens, kag ducks kag nagpatigayon sang disinfection sa lugar magluwas pa sa hugot nga pagdumili sa pagsulod sa apektado nga poultry farm.
Mahibaluan nagpositibo ang laboratory result sang poultry serum kag oropharyngeal swab samples gikan sa nasambit nga barangay nga ginpaguha sang Bureau of Animal Industry - Veterinary Laboratory Division.
Ginklaro sang lokal nga gobyerno nga 'isolated area' ang poultry farm nga ginpaidalom sa laboratory test kag malayo man sa mga puluy-an sang pumuluyo.
Ginpasiguro sang lokal nga gobyerno sa publiko nga ginahimo sini ang tanan nga lihok agud malikawan ang paglapta sang bird flu kag maproteksiyunan ang publiko batuk diri.
Padayon naman nga maga-monitor ang Roxas City Veterinary Office kag maga-koordinar sa Provincial Veterinary Office agud matapna ang posible paglapta sang virus kag malikawan ang transmisyon sini sa tawo.
