By: Joshua Kenneth Anas | January 19, 2023
Nagasalig ang pamunuan sang Philippine National Police Academy (PNPA) sa gintukod nga 5-man committee nga amo ang magasala sa mga courtesy resignations sang mga 3rd level officials sang PNP.
Sa statement nga ginpadala sang PNPA sa Kampo Krame, ginpahayag sang mga 3rd level officers sang PNPA sa pagpanguna ni PNPA Superintendent Police Maj. General Eric Noble nga suportado nila ang panawagan ni Department of the Interior and Local Government (DILG) Sec. Benjamin Abalos Jr., kag ni PNP Chief Police General Rodolfo Azurin Jr., nga saligan ang proseso sa pagtinlo sang hanay sang PNP.
Suno pa kay Gen. Noble, bilang premier police higher education institution ang PNPA, ila nga igaduso ang Core Values of Justice, Integrity and Service.
Sa karon, nagdangat na sa 98.42% ukon 936 ka mga koronel kag heneral ang nakasumiter sang ila nga courtesy resignation kun sa diin 18 na lamang gikan sa kabug-usan nga 954 ka mga 3rd level officers ang wala pa nakasumiter sang ila nga courtesy resignation.
