By: Ej Arboleda | December 18, 2022
Pilason ang anom ka miyembro sang 20th Infantry “We Lead” Battalion (IB) sang Philippine Army matapos malukpan sang landmine sang New People’s Army (NPA) sa Barangay Quirino, Las Navas, Northern Samar subong nga adlaw sang Domingo, December 18.
Suno kay Lieutenant Colonel Joemar Burban, commander, sang 20th IB nga gin-detonate sang mga rebelde nga grupo ang anti-personnel mines (APMs) batok sa Mobile Community Support and Sustainment Program (MCSSP) team nga nagabantay sang water system project sa lugar.
Ginkondinar naman ni Major General Camilo Ligayo, commanding general sang 8th Infantry Division, ang pag-usar sang NPA sang ginadumilian nga APM bangud isa ini ka sahi nga paglapas sa international humanitarian law.
Nahibaluan sadtong bulan sang Abril, duha ka pulis ang napatay, samtang sang bulan naman sang Hulyo, isa ang patay nga militar kag 12 naman ang pilason sa nasambitan nga probinsya bangud sa APM nga insidente.
Ginapanawagan naman sa karon ni Burban sa Commission of Human Rights (CHR) nga imbestigahan kag maghatag sang pahayag kaangut sa pagbayolar sang Ottawa Convention, International Humanitarian Law, kag sang Republic Act 9851 (Philippine Act on Crimes Against International Humanitarian Law, Genocide, and other Crimes Against Humanity) nga gin-alegar nga ginhiwat sang mga NPA sa probinsya.
