By: Joshua Kenneth Anas | December 18, 2022
Gin-aprubahan ni Presidente Ferdinand R. Marcos Jr. ang administrative order nga magahatag sang service recognition incentive (SRI) sa mga empleyado sa executive department subong man ang one-time rice allowance sa tanan nga empleyado sang gobyerno para sa ini nga tuig.
Base sa AO, indi dapat maglapaw sa P20,000 ang one-time SRI sa executive department personnel.
Kalakip sa mga sarang makabaton sang insentibo ang mga sibilyan nga katapo sa mga national government agencies (NGAs), mga yara sa state universities and colleges (SUCs), government-owned or controlled corporations (GOCCs), regular, contractual ukon casual emplo¬yees, ¬miyembro sang militar kag pulisya, subong man ang mga katapo sang bumbero kag bilangguan sa idalom sang Department of the Interior and Local Government (DILG).
Magabaton man sang insentibo ang mga katapo sang Bureau of Corrections (BuCor), Philippine Coast Guard (PCG), kag National Mapping and Resource Information Authority (NAMRIA).
Ang mga empleyado sang duha ka panalgan sang Kongreso, Hudikatura, Office of the Ombudsman kag mga Constitutional offices ang sarang mahatagan sang isa ka beses nga SRI nga indi maglapaw sa P20,000.
Ang mga empleyado sa local government units (LGUs), kalakip na ang mga yara sa barangay, ang sarang magbaton sang insentibo depende sa ikasarang sang LGU.
Ginapasugtan man ni Marcos ang paghatag sang isa ka beses nga rice assistance sa mga katapo sang gobyerno.
Kalakip sa mga nagakadapat magbaton sang rice subsidy ang mga sibilyan nga katapo sang NGAs, kalakip ang mga yara sa SUCs, GOCCs, government financial institutions (GFIs), government instrumentalities nga may corporate powers, kag government corporate entities nga may regular, contractual ukon casual positions.
May kinamatarong man ang mga katapo sang militar, pulis, bumbero, kag bilangguan nga makabaton sang bulig nga bugas.
Ang mga empleyado sang BuCor, PCG, kag NAMRIA ang makabaton man sang suporta.
