By: Joshua Kenneth Anas | December 16, 2022
Nakakuha ang Pilipinas sang multi-bilyon pesos nga balor sang investment deal gikan sa mga nagapanguna nga kumpanya sa Europa kalakip ang Unilever sa mga sinapol ni Presidente Ferdinand Marcos Jr. sa Brussels, Belgium.
Ginpahayag sang Malacañang nga ang presidente sa iya katapusan nga adlaw sa Brussels para sa Association of Southeast Asian Nations-European Union (ASEAN-EU) commemorative summit, ang nagpakigsapol sa mga kompaniya nga European nga Unilever, Ocea, Acciona kag Semmaris kun sa diin gintalakay ang mga plano sa pagpasanyog sang investment sa Pilipinas.
Magapain ang multinational consumer goods company nga Unilever sang P4.7-bilyon nga capital samtang nagapreparar ini sa pag-automate kag pag-digitize sang mga operasyon; ang French firm naman nga Semmaris ang interesado sa agro-logistics paagi sa wholesale market; kag ang French shipbuilding firm nga OCEA S.A. ang magaduso sang P1.5-bilyon shipyard development.
