By: Jolito Valles Borda | December 18, 2022
Patay ang driver sang motorsiklo samtang pilason naman ang angkas sini matapos nga gin hit-and-run sa Barangay Punta Tabuc, Roxas City.
Ginkilala ang napatay nga si Jomel Sombero 26-anyos kag ginkilala naman ang angkas sini nga si James Salaya 24-anyos lunsay mga residente sang Barangay Sinondojan, Mambusao, Capiz.
Sandig sa imbestigasyon sang kapulisan, papuli na kun tani ang mga biktima sang sila ang ginbungguan sang nakasugata nga salakyan (Tamaraw FX) nga nagaduag sang Gray kag ginapahayag nga nagpangagaw sang linya.
Bangud sa impak sang pagbunggo, nag-angkon sang patal nga pilas sa ulo si Sombero nga gindeklarar nga dead on arrival sang doktor.
Samtang, pilas sa magkatuhay nga parti sang lawas ang naangkon ni Salaya nga nagapabilin pa karon sa ospital.
Madasig naman nga nagpalagyo ang wala matumod nga driver nga sa karon padayon pa nga ginapangita sang kapulisan.
