By: Jolito Valles Borda | January 4, 2023
Ginkawatan sang spare parts ang duha ka motorsiklo sa Barangay Tawog, Sigma, Capiz kaina sang kaaganhon.
Sa pagpangusisa sang Radyo Bandera Roxas sa lugar, duha ka unit sa smash nga motorsiklo ang nabiktima sang wala matumod nga kawatan.
Nataban sa duha ka motorsiklo ang pang-ulihe nga kariton, gasolina kag apido nga tambutso.
Sandig sa na tsekyar nga CCTV footage sang mga biktima, ginapahayag nga sakay sa Bajaj nga motorsiklo ang duha ka mga suspek nga nakasuksok sang itum kag puti nga T-shirt.
Halos 30 minutos lamang nagdugay ang pagtaban sang kawatan nga na tsekyar sa CCTV, sa diin ala 1:34 nakit-an pasulod sa lugar kag nagguhan alas 2:02 kaina sang kaaganhon.
Mahibaluan nga masami na nga gina-parking sang mga biktima ang ila motorsiklo sa kilid sang karsada bangud nga indi na ini makatabok pasulod sa ila balay.
