By: Roldan Villareal | January 3, 2023
Nagdangat na sa siyam ang nabalhag nga fireworks related injuries sa probinsya sang Capiz sumugod Disyembre 1 tubtob Enero 2, 2023.
Suno sa tagpamaba sang Department of Health (DOH) - Capiz nga si Jeoffry Espiritu, 3 sa nasambit nga kaso ang nagikan sa Tapaz, 2 sa Ivisan, 2 sa Jamindan, isa sa Sigma kag isa sa Mambusao.
6 sa mga biktima ang nalukpan ukon napaso, duha ang nag-angkon sang eye injury kag isa naman ang nalukpan kag na-utdan sang tudlo.
Kalakip sa mga palupok nga nakapilas sa mga biktima ang wistle bomb (3), boga (2), fountain (1), triangle (1), kag duha ang tuga sang wala matumod nga sahi sang palupok.
Sa karun nakapauli na ang walo ka mga biktima sa ila tagsa ka poluyan matapos madapatan sang pagbulong kag ang isa ka nautdan sang tudlo ang padayon nga ginabulong sa Western Visayas Medical Center.
Ginapabugyanan ni Espiritu nga ang iban nga nabiktima sang palupok nga magpadulong na sa gilayon sa pinakamalapit nga health center sa ila lugar agud madapatan sang nagakaigo nga pagbulong kag malikawan ang impeksyon.
