By: Jolito Valles Borda | December 14, 2022
Nagapabilin nga hilway gihapon batuk sa African Swine Fever (ASF) ang probinsya sang Capiz.
Ini ang ginkumpirmar ni Dr. Leonel Abordo, pinuno sang Office of the Provincial Veterinarian sang ma-interview sang Radyo Bandera Roxas.
Suno kay Abordo, lunsay negatibo ang resulta sa balatian nga ASF ang ila mga ginpadala nga blood sample nga naghalin sa magkatuhay nga piggery farm sa probinsya.
Nagapadayon sa gihapon ang ila pagbantay sa mga border checkpoint nga mas ginpasangkad pa sang magkatuhay nga LGU kag ahensiya sang gobyerno ini agud masiguro nga malikawan nga makalusot pasulod ang mga buhi nga baboy, karne, kag pork products nga posibli kontaminado sang ASF.
Ginpanugyan man ni Abordo sa publiko ang kooperasyon agud malikawan sang Capiz ang nagakatabo nga paglatun-laton sang ASF sa pila ka mga kabanwahanan sa Iloilo.
