By: Jolito Valles Borda | December 16, 2022
Negatibo sa avian influenza ukon bird flu ang ikaduha nga hugna sang blood sample sang mga manok sa Roxas City.
Ini ang ginkumpirmar ni Dr. Leonel Abordo, pinuno sang Office of the Provincial Veterenarian (OPVET) Capiz sang napakig-angutan sang Radyo Bandera Roxas.
Suno kay Abordo, ginkuha ang mga samples sa mga manok nga yara sa 1 kilometer radius halin sa poultry farm nga una nabalhag ang kaso sang bird flu.
Mahibaluan, gilayon nga ginhatagan sang nagakaigo nga tikang sang lokal nga gobyerno sang syudad ang pagkalamatay sang mga manok sa nasambit nga poultry farm nga ginpaidalum sa laboratory test kag nagpositibo sa bird flu.
Matandaan nga halin sa probinsya sang Iloilo ang nagpositibo nga mga manok kag ginpahayag sang lokal nga gobyerno sang syudad nga isolated ang nasambit nga kaso.
