By: Roldan Villareal | December 13, 2022
Positibo nga gintumod sang isa sa mga nakasaksi sa nagluntad nga pagpang-holdap sa Barangay Lawaan, Roxas City kahapon nga adlaw nga ang nadakpan sang kapulisan ang isa sa mga responsable sa natabo nga insidente.
Suno sa wala na ginhingadlan nga nakasaksi, nagamaneho ini sang iya salakyan kahapon pasado alas 10 sang aga sang hinali makabati sang lupok sang armas luthang.
Ginkakibot sini sang makitan nga duguon na ang mga sakay sa tricycle nga mga biktima kag nagapalagyo na sa lugar ang apat tanan ka mga suspetsado sakay sa duha ka separado nga motorsiklo.
Isa diri ang nahitsuraan sini nga amo ang nakabitbit sang kahon nga may unod nga kwarta. Suno pa sa nakasaksi nga naga anggid ang nawong kag panglawason sang natumod nga suspek nga si Wiliam Deocampo sang Jolongajog, Pontevedra sa nakit-an sini nga isa sa mga suspetsado.
Nagalaum ini nga indi lamang si Deocampo ang matumod kag madakpan sang mga otoridad kundi kalakip na ang iban pa nga mga suspetsado sa krimen.
