By: Jolito Valles Borda | December 7, 2022
Pagtapna sa pag-inum kag pagsugal sang suspek samtang naga-duty ang ginatan-aw nga motibo sa pagluthang-patay sa kaangay nga suldado sa Barangay Pinamalatican, Sigma, Capiz.
Ini ang ginpahayag ni Marinel Aranzado Daran, asawa sang biktima nga si Staff Sergeant Mariano Daran sang ma-interview sang Radyo Bandera Roxas.
Suno kay Marinel, nakatawag pa kagab-i ang iya bana kag nakahambal nga gin-report sini sa ila opisyal ang ginahimo nga pagsugal kag pag-inum sang suspek nga si Corporal Jomarie Fermaran samtang naga-duty.
Dugang pa sang ginang, ginpaandaman man sang iya bana ang suspek nga untaton ang ginahimo bangud posibli mabalikan ini bilang team leader nga naka deploy bilang honorary guard sa nagtaliwan nila nga kabaro.
Wala naman sang iban pa nga rason nga nakita si Marinel sa brutal nga pagpatay sa iya bana.
