By: Jolito Valles Borda | December 5, 2022
Ginkumpirmar ni Punong Barangay Arturo Aragon Sr. ang pagpositibo sang balatian nga Bird Flu sa isa ka poultry farm sa Sitio Cablatan, Barangay Cagay, Roxas City.
Suno kay Aragon, ginpalab-ot sa iya nga may pila na ka mga manok ang nagkalamatay sa nasambit nga farm kag gilayon man sini nga ginpalab-ot sa talatapan sang syudad.
Ginapahayag nga kapin lima na katuig nga nagahupot sang ‘layer’ ang tag-iya sang farm kag ini ang labing una nga higayon nga nagpositibo sa bird flu ang ila hinuptanan nga mga manok.
Dugang pa ni Aragon, masubra pa lang isa ka semana ang mga manok nga nag-abot sa nasambit nga farm kag wala pa ini makapangitlog kag ginbaligya sa merkado.
Bangud dire, ginpasiguro ni Aragon ang hugot nga monitoring sa bilog nga barangay kag magahatag sang update sa city government angut sa kaso sang balati-an.
Mahibaluan nga ginpaidalum na sa pag-disinfect ang lugar kag gin-quarantine naman sa sulod sang napulo ka adlaw ang bantay sang poultry farm.
