By: Jolito Valles Borda | December 15, 2022
Arestado ang isa ka lalaki matapos madakpan sa ginkasa nga drug buybust operation sang mga kapulisan sa Barangay Natividad, Pilar, Capiz.
Ginkilala ang drug suspek nga si Wenceslao Patricio Jr. , 40-anyos, residente sang Barangay Dulangan sang nasambit nga banwa.
Narekober sa paghinakop sang drug suspek ang 3 tanan ka sachets sang shabu nga nagabug-at sang 11 ka gramo nga nagabalor sang kapin P75,000 kag P1000 nga buybust money.
Ang nasambit nga operasyon ang ginkasa sang gintingob nga pwersa sang Pilar Municipal Police Stations kag Provincial Drug Enforcement Unit sang Capiz Police Provincial Office.
Sa karon, nakaaresto na si Patricio kag natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
