By: Ej Arboleda | December 12, 2022
Pilason ang tatlo ka persona sa nagluntad nga pagbungo-anay sang duha ka motorsiklo sa Km2 Barangay Lawaan, Roxas City.
Ginkilala ang driver sang Kawasaki Bajaj CT100 nga si Andro Francisco, 21 anyos, nga residente sang Barangay Banica kag ang iya backrider nga si Christian Van Arantez, 24 anyos, kag residente sang Barangay IX sining syudad.
Nakilala naman ang driver sang Kawasaki Bajaj CT100B nga si Jemuel Francisco nga residente sang Barangay Carataya, banwa sang Cuartero nga temporaryo nagapuyo sa Barangay Dinginan, Roxas City.
Sa pagpangusisa sang Radyo Bandera sa lugar nga parihas ginasubay sang duha ka motorsiklo ang karsadahon nagikan sa Barangay Lawaan padulong sa syudad sang Roxas.Apang, nag-untat kag nagtuyo kuntani magliko ni Andro sa bahin sang Petron gasoline station para magpakambyo sang cheke, hinali na lang ini ginbungo-an ni Jemuel nga gina-alegar nga madasig ang padalagan sang iya motorsiklo.
Namutikan man nga yara sa idalom sang impluwensiya sang makahulubog nga ilimnon si Jemuel sang natabo ang aksidente.
