By: Ej Arboleda | December 8, 2022
Dakop sa ginpatigayon nga operasyon sang gintingub nga pwersa sa mga katapo sang Dumarao PNP, 2nd Capiz Provincial Mobile Force Company (CPMFC) kag Capiz Provincial Intelligence Unit (PIU) ang isa ka babayi nga nagapataya sang ilegal nga sugal sa Sitio Tagulab, Poblacion Ilawod sa banwa sang Dumarao.
Ginkilala ang suspetsado nga si Gerly Osabel Bernas, 35 anyos nga residente sang Barangay Janguslob sang nasambit nga banwa.
Suno sa otoridad, nga na-aktohan sini nila si Bernas nga nagapangkolekta sang pataya para sa illegal nga sugal.
Narekuber naman sa paghinakop sini ang 1 ka notebook, 2 stub ka cotejo, ballpen, chalk, cellphone kag P672 nga cash.
Sa karon nakahunong na sa karsel sang Dumarao PNP si Bernas kag napangatubang sa kaso nga pagbayolar sa Presidential Decree 1602 ukon Illegal Gambling.
