By: Abe Ballos | December 16,2022
Duha ka mga grade 9 nga estudyante sang Roxas City School for Philippine Craftsment ( RCSPC ) ang nagtapungulay sa sulod sang isa ka banyo mismo sa nasambit nga buluthuan.
Sa exclusibo nga impormasyon nga nakuha sang Radyo Bandera Roxas nahibaluan nga nagluntad ang nasambit nga hitabo sang tinalikdan nga Miyerkules sa diin naimbulbar ang isa ka 14 kag 17 anyos nga mga Grade 9 Students.
Sa pagpakig angot sang Newsteam sa 14 anyos nga soltero,nahibaluan nga gisi ang tuo nga bahin sang naibabaw nga bibig sini lakip na ang paghabok sang pila ka porsiyon sang itsura sini tuga sang pagsumbag.
Nahibaluan nga nagkasugot ang duha sa guinapahayag friendly sparring matapos guinpahayag sang 14 anyos nga soltero nga madugay na ini nga guina-bully sang pila ka mga classmate kag guinatawag nga “matalaw” sa tion nga indi ini magbato.
Apang bangud wala sang eksperyensiya sa patag awayan,diri kag nakabaton ini sang tatlo ka mga igo sang inumol sang ka-engkwentro nga 17 anyos nga isa gali ka atleta sa boksing sang nasambit nga buluthuan.
Bangud sini,matigdas nga guinpahayag sang 41 anyos nga iloy nga si Elvira Villa , nga indi sila magpahusay sa baylo magapasaka sang nagakaigo nga panumbungon,angot sa nadangatan nga kapilasan sang iya anak.
