By: Joshua Kenneth Anas | November 25, 2022
Nagpaguha na sang Investigation Report ang gintukod ni Mayor Ronnie Dadivas nga Independent Committee nga nagpangusisa agud matumod kun ano ang kabangdanan sang pag-collapse sang porsyon sang Riverside Promenade Phase III sa Washington Street, Barangay VI, Roxas City.
Sa ginpatigayon nga pulong-balitaan, ginpatpat ni Foundation – Piling Specialist Senior Structural/Geotechnical Engr. Arturo G. Tabia, ang resulta sang ila ginpatigayon nga soil investigation kun sa diin natumod nga rason sa pag-usmod sang porsyon sang proyekto.
Nahibaluan nga may ‘montmorillonite clay mineral’ ang duta nga ginplastaran sang proyekto nga makabig nga mahuyang kag madasig mag-usmod ilabi na kun mabasa sang tubig.
Sa ginpatigayon naman nga site investigation nadiskubrehan nga ang ground area kun sa diin natabo ang ‘overturning’ ukon pag-usmod sang on-going construction ang may dako gid man nga risgo sa ‘soil erosion’.
Diri nahibaluan man nga kulang sang ‘weepholes’ kag ‘perforated pipes’ sa lokasyon rason nga natipon ang tubig nga ginkabangdan sang paghumok sang duta.
Bangud diri, ang gintingob nga kabug-aton sang duta kag tubig ang nakawasak kag nagresulta sa amat-amat nga pagluya sang pundasyon sang istruktura tubtob nga ini ang dalayon nga nausmod.
Suno kay Engr. Tabia, apisar nga ini ang makabig nga ‘unforeseen incidents’ ukon wala ginalauman nga matabo apang nagapati siya nga may nangin kakulangan man sa ila trabaho ang MBM Construction nga amo ang nagaserbi nga kontraktor sang nasambit nga proyekto.
Ginklaro man sini nga solido kag mapag-on ang istruktura sang proyekto apang nag-usmod lamang bangud sa naghumok nga duta sa higad sang suba.
Mahibaluan nga kaupod ni Engr. Tabia sa gintukod nga komitiba ni Mayor Dadivas nga ginmanduan nga usisaon ang natabo sa proyekto amo sanday Civil/Structural Engr. Ramil Artates; Civil Engr. Reuben Yap sang Philippine Institute of Civil Engineers; Civil Engr. Ryan Robles sang Department of Public Works and Highways; kag OIC-City Engr. Antonio Amoroso.
Find the latest news and information here:
https://635f8b5ae6d61.site123.me/
https://www.facebook.com/groups/5433774736645634/?ref=share_group_link
Ini nga balita gindul-ong sa inyo sang THE POWER TRIO!
#ClinicaDTX500- The superior antioxidant!
#ClinicaD3BIO - The antiviral specialist!
#PURECEE -The immunity booster!
𝙉𝙖𝙜𝙖𝙗𝙖𝙣𝙙𝙚𝙧𝙖 𝙨𝙖𝙣𝙜 𝙢𝙖𝙩𝙪𝙤𝙙 𝙣𝙜𝙖 𝙨𝙚𝙧𝙗𝙞𝙨𝙮𝙤 𝙥𝙪𝙗𝙡𝙞𝙠𝙤 𝙠𝙖𝙜 𝙠𝙖𝙡𝙞𝙣𝙜𝙖𝙬𝙖𝙣, 𝙨𝙖 𝙋𝙧𝙤𝙗𝙞𝙣𝙨𝙮𝙖 𝙨𝙖𝙣𝙜 𝘾𝙖𝙥𝙞𝙯, 𝙍𝘼𝘿𝙔𝙊 𝘽𝘼𝙉𝘿𝙀𝙍𝘼!
