By: Ej Arboleda | December 13, 2022
Nadakpan sang kapulisan ang 22 anyos nga lalaki nga wanted person sa kaso nga Murder kag robbery sa Barangay Poblacion, Tapaz, Capiz.
Ginkilala ang mga nadakpan nga si Jereil Olog, nga residente sang Barangay Roxas, sang nasambitan nga banwa.
Ang warrant of arrest sa kaso nga murder ang gin-isyu kag ginpirmahan ni Judge Rommel L. Leonor sang RTC 6th Judicial Region, Branch 21, Mambusao, Capiz kag napetsahan sang January 26, 2021.
Samtang ang warrant of arrest sa kaso nga robbery ang gin-isyu kag ginpapanaog naman ni Judge Judith D. Orendain-Tonogbanua, sang RTC 6th Judicial Region, Branch 20, Mambusao, Capiz nga napetsahan August 24, 2020.
Wala naman sang may ginrekomendar nga piyansa ang korte sa kaso nga murder apang P100,000 naman ang gintalana nga piyansa para sa kaso nga robbery sa akusado.
Sa karon, yara na ini sa kustodiya sang Tapaz Municipal Police Station para sa nagakaigo nga disposisyon.
