By: Roldan Villareal | December 4, 2022
Ginapanugyanan ang mga biktima sang double your money investment scam nga magdangop sa National Bureau of Investigation (NBI) agud ma aksyonan ang ila nga kaso.
Ini ang ginpahayag ni NBI Capiz Investigation Agent III John Katipunan kasunod sang pagkadakop sang lima ka mga persona nga ginatudlo yara sa likod sang Global Wealthness Creative Partners kag iban pa nga investment scams.
Suno pa kay Katipunan, indi magpati ang publiko sa matam-is nga tinaga sang mga manugtunto bangud wala sang kamatuoran ang ‘double your money’ bangud bisan ano nga bangko ukon kompaniya, indi sini sarang makahatag.
Kinahanglan man mag reklamo ang mga biktima agud maaksyonan ini sang ila talatapan bangud ang pagka aresto kay Cherrie Cartujano sang Barangay Balijuagan, Roxas City; Clarisa Dela Cruz sang Barangay San Juan, Cainta, Rizal; Neil Doqueza sang Zone 2, Santo Niño Norte, Iloilo City; Jenelyn Sayson sang Poblacion Sur, Balasan, Iloilo; kag Ludy Dolor sang Burgos Street, Roxas City ang bunga sang nabaton sang mga ini nga reklamo sang mga biktima.
Nagpaandam man ang opisyal sa iban pa nga grupo nga posibli nagapanunto nga mag untat na sa ilegal nga bulohaton bangud indi magpang duha-duha ang NBI sa pagdakop sa ila.
