By: Jolito Valles Borda | December 5, 2022
Pilason ang 42-anyos nga mister matapos ginbuno sang iya kaupod sa ilimnan sa Barangay Bergante, Mambusao, Capiz.
Sandig sa imbestigasyon sang Mambusao PNP, ginkilala ang biktima nga si Richard Escala Gomez, samtang ang suspek amo si Osmundo Norba Gaspar 64-anyos nga lunsay mga residente sang nasambit nga barangay.
Ginapahayag nga magkaupod pa ang mga ini nga nagainum kagab-i sa balay sang suspek antis natabo ang insidente.
Suno sa kapulisan may natabo nga wala paghangpanay sa tunga sang suspek kag asawa sang biktima matapos nga ginsugat sini ang iya bana samtang naga-inum.
Natambagan naman ang nasmabit nga insidente kag nagpauli ang mag-asawa nga yara lamang sa tabuk ang balay sang mga ini sa suspek.
Apang, hinali na lang nga nag-apas sa mga ini ang suspek kag ginbuno ang biktima nga na-igo sa tiyan nga gilayon man gintabangan sang mga residente sa lugar.
Nagpalagyo pa ang suspek apang ini ang andakpan sa ginpatigayon nga hot pursuit operation sang Mambusao PNP.
Padayon pa sa karon nga ginatatap sa ospital ang biktima sa naangkon nga pilas.
