By: Jolito Valles Borda | December 9, 2022
Ginpasaka na sa Provincial Prosecutors Office ang kaso nga Murder batuk sa miyembro sang Philippine Army nga nagluthang-patay sa iya kabaro sa Barangay Pinamalatican, Sigma, Capiz.
Matandaan nga dead on the spot si Staff Sergeant Mariano Daran 43-anyos sa pagpangluthang sang suspek nga si Corporal Joemarie Fermaran 41-anyos nga nagserbi ang mga ini bilang honor guard sa nagtaliwan nga miyembro sang Philippine army sa nasambit nga lugar.
Mahibaluan nga gintuad sa Radyo Bandera Roxas ni Marinel Daran, asawa sang biktima nga ginsaway sang iya bana ang pagsugal kag pag-inum sang suspek samtang naga-duty kag ang pag-report sini sa ila opisyal.
Ini ang ginlantaw nga motibo sang ginang sa kamatayon sang iya bana apang, depensa sang suspek nga tuman na sini ang iya kaakig bangud sa ginapanghambal kag pagpakahuya ni Daran sa iya apisar nga may mga sibilyan nga nagapamati.
Ginapahayag nga may separado na sa karon nga imbestigasyon ang hanay sang 12TH Infantry Battalion angut sa insidente nga imbolbado ang ila duha ka miyembro.
