By: Roldan Villareal | December 6, 2022
Sentro sang reklamo sang mga residente kag motorista nga nagalabay sa Barangay Timpas, Panitan ang halos napabay-an na nga road rehabilitation project sang Department of Public Works and Highways (DPWH) sa nasambit nga lugar.
Suno sa mga tagreklamo nga nagdangop sa 100.9 Radyo Bandera Roxas, bulan pa sang Pebrero sang ginsuguran ang pagbuho-buho sa dalan, apang tubtob sa subong wala sa gihapon matapos ang pagkaayo sa ginbuho-buhuan nga dalan.
Delikado man sa mga motorista ang amo nga lugar ilabi na sa tiun sang kagab-ihon bangud wala sang napahamtang nga nagakaigo nga early warning device. Pila na ka aksidente ang nabalhag sa lugar bangud sa amo nga kakulangan.
Nagalaum ang mga ini nga aksyonan sang DPWH ang amo nga reklamo bangud nagahatag na ini sang perwisyo kag peligro sa pumoluyo.Nahibaluan nga ang nasambit nga proyekto ang may pundo nga P56,731,122.
Naga serbi nga kontraktor sini ang F. Gurrea Construction Inc.Sa karun ginatinguhaan pa sang Radyo Bandera nga makuhaan sang pahayag ang kontraktor sang nasambit nga proyekto kag ang DPWH.
