By: Joshua Kenneth Anas | December 13, 2022
Nangin madinalag-on ang pagpasakop sang pambato sang Capiz nga taga-Barangay Milibili, Roxas City sa Hari ng Pilipinas 2022 – “Matikas, Marangal, Marunong, Makatao” nga ginhiwat sa Ormoc City.
Nalakip sa Top 10 Finalist si Joshua Azares, estudyante sang Hercor College nga nagakuha sang kurso nga Bachelor of Science in Hospitality Management ang kabahin sang 45 ka mga kandidato nga magapaidalom sa serye sang mga aktibidad para sa HNP 2022.
Nangin Top 7 finisher naman si Azares kag naghakot pa sang mga pasidungog kalakip na special awards nga Mr. Sacay-Bernoth Financing Corp.; Mr. Twilight Tower; Mr. Aephoria Choice Award.
Nakuha man sini ang minor award nga Best in Fashion Forward Attire kun sa diin iya ginpasundayag ang obra-maestra sang Capisnon designer nga si Jo Moses Beramo.
Sa iya nga Facebook post, ginpasalamatan naman ni Azares ang tanan nga nagsuporta sa iya nga pagpasakop sa nasambit nga paindis-indis ilabi na ang Hari ng Pilipinas – Capiz Production Team nga ginapamunuan sang Provincial Director kag nagserbi niya nga handler nga si Mr. Mark Kevin Balbona.
Nagpasalamat man si Balbona sa Radyo Bandera nga amo ang media partner sa pagpalab-ot sa publiko sang mga aktibidad kag preparasyon ni Azares para sa nasambit nga kompetisyon.
Samtang nakuha sang taga-Laguna nga si Marvin Diamante ang titulo bilang Ikalawang Lakan; Unang Lakan si Wayne Banaybanay sang Negros Oriental; kag Hari ng Pilipinas 2022 si Marx Justiniani sang Negros Occidental.
