By: Joshua Kenneth Anas | December 12, 2022
Yara na karon sa estable nga kondisyon ang pumpboy kag cashier sang isa ka gasoline station matapos nga naluthangan sa pagholdap sang wala pa matumod nga riding-in-tandem sa Barangay Lawaan, Roxas City.
Nakilala ang mga biktima nga sanday Jovel Alparaque, pumpboy, residente sang Angelville Subdivision, Barangay San Jose, kag Rodora Dorado Vinson, cashier, residente sang Barangay 11.
Mahibaluan nga sakay ang mga ini sa tricycle nga ginamaneho ni Alparaque kag may bitbit nga dako nga kantidad sang kwarta gikan sa ila ginatrabahuan nga gasolinahan padulong sa city proper.
Base sa pagpangusisa sang Radyo Bandera Roxas sa lugar, napuhag ang mga pumuluyo sa lugar matapos makabati sang kapin duha ka lupok sang armas-luthang.
Ginpahayag naman ni alyas Boy, isa sa nakasaksi, nagasunod ang motorsiklo nga sakay sang riding-in-tandem sa tricycle sang mga biktima kag ini ang ila gintambangan kag nagdeklarar sang holdap.
Nagbato naman sanday Alparaque kag Vinson sa mga suspetsado bangud nag-agaway pa sang bag kag box nga may unod nga kwarta.
Bangud sa pagbato sang mga ini, lunsay sila ginluthang sang mga suspek rason nga nag-agom si Alparaque sang pilas malapit sa tiyan kag sa kamot naman ang pilas ni Vinson.
