By: Jolito Valles Borda | December 3, 2022
Ginkaalarma sang mga pasahero kag personnel ang ginaalegar bomba nga ginbilin sa Roxas City Integrated Transport Terminal sa Pueblo De Panay, Brgy. Lawaan, Roxas City.
Sa interview sang Radyo Bandera Roxas kay Provincial Director Police Colonel Jerome Afuyog Jr., isa ka gamay nga karton ang nakuha sa isa ka unit sang bus nga may mga wiring kag kaangay sa isa ka bomba.
Mahibaluan nga halin sa Passi City ang bus kag nagdulog sa terminal. Ginapahayag nga nakit-an sang konduktor sang bus ang nasambit nga butang kag ini ang gintugyan sa guwardiya nga madasig naman sini gindala sa tabuk sang terminal bangud sa pagduda nga isa ka bomba.
Gilayon man nga nagrespondi ang kapulisan kag EOD/K9 nga ginsarado ang lugar agud mahatagan sang ligwa ang nasambit nga report.
Pila pa ka oras sang masiguro sang kapulisan nga indi bomba ang nasambit nga butang sa bulig sang EOD personnel kag canine sang PCG-Capiz rason nga ginpalupok ang ginadudahan nga bomba.
Nadiskubrehan nga balas lamang ang sulod sang karton, ginadudahan naman sang kapulisan nga pagpamahug ang tuyo sang may kahimuan.
Nagapadayon pa sa karon ang imbestigasyon sang kapulisan sa nasambit nga insidente.
