By: Joshua Kenneth Anas | December 4, 2022
Nagatuhaw sa karon ang pangalan sang isa ka miyembro sang Philippine National Police sa Roxas City, Capiz nga imbulbado sa ‘investment scams’ sang lima ka indibidwal nga nadakpan sa entrapment operation sang National Bureau of Investigation (NBI) sa banwa sang President Roxas sadtong Disyembre 2, 2022.
Base sa nakuha nga impormasyon sang Radyo Bandera Roxas, mismo ang isa sa nagkaladakpan ang nagbuyagyag sang pangalan sang pulis nga kabahin sang ila ilegal nga double-your-money investment scam.
Suno diri nga kabahin ang nasambit nga miyembro sang PNP sa mga indibidwal nga yara sa likod sang investment scam kag ginaalegar nga nagaserbi pa nga protektor sa iban sini nga mga kaupdanan.
Samtang, hungod nga wala ginhingadlan ang nasambit nga opisyal samtang padayon pa ini nga gina-imbestigahan sang otoridad.
Matandaan nga ang nagkaladakpan sa operasyon sang otoridad amo sanday Cherrie Cartujano - Barangay Balijuagan, Roxas City; Clarisa Dela Cruz - Barangay San Juan, Cainta, Rizal; Neil Doqueza - Zone 2, Santo Niño Norte, Iloilo City; Jenelyn Sayson - Poblacion Sur, Balasan, Iloilo; Ludy Dolor - Burgos Street, Roxas City.
Ba-se sa mga fake vouchers nga nakompiskar sa mga nadakpan, nasaad ang mga pangalan sang peke nga kompaniya kalakip na ang Finance Experts; Nexus Capital Traders; Capital Wealth Investment Partners; Global Wealthness Creative Partners.
Nabalhag naman sa mga peke nga vouchers ang pangalan sang magkatuhay nga mga CEOs kalakip ang Mark Garcia; Mark Peñalosa; Miguel Peñalosa; kag Victor Pelayo.
Suno kay NBI-Capiz Deputy Executive Director Agent John Katipunan, base sa ila imbestigasyon, nagadoble ang kwarta sang investor sa sulod sang pito tubtob 20 ka adlaw depende sa kantidad sang kwarta nga ginapasulod.
Suno kay Katipunan, una sila nga nakabaton sang sulat gikan sa isa ka concerned citizen natuhoy sa ilegal nga aktibidad rason nga ila ini nga gin-imbestigahan.
Napamatud-an nga naga-eksister ang nasambit nga investment scam sadtong Nobyembre 28, 2022 matapos nakapay-in ang isa ka NBI Agent nga nagpakilala nga investor sa mga indibidwal nga yara sa likod sini.
Ginkasa ang operasyon sa bulig sang isa ka complainant nga taga-Batad, Iloilo nga nag-invest sang P200,000.
Suno kay Katipunan, mas o menus isa ka bulan pa lamang nga naga-operate ang nasambit nga investment scams nga nakatipon na sang kabug-usan nga kapin P2 milyon gikan sa natuntuhan nga mga biktima.
