By: Ej Arboleda | December 16, 2022
Nagdangat na sa 14,000 ang kabug-usan nga kaso sang dengue sa Western Visayas, sandig sa datos sang Department of Health (DOH) humalin Enero 1 tubtob Disyembre 3, 2022.
Ang nasambit nga numero ang 516 porsiyento nga mas mataas kun ikomparar sa 2,402 ka mga kaso nga nabalhag sa kapareho nga period sang tinalikdan nga tuig sang 2021.
Base man sa datos, kadamuan sa mga nakaangkon sang nasambit nga balatian amo ang naga-edad sang isa tubtob napulo ka tuig – nga 40 porsiyento sang kabug-usan nga kaso.
Mahibaluan nga sa Morbidity Week Number 48, nabalhag sa rehiyon ang 87 ka dugang nga kaso sang balatian nga dengue.
Sa pangkabug-usan, may pinakamadamo nga kaso sang nasambit nga balatian ang Negros Occidental nga may 5,319; ginasundan sang Iloilo Province nga may 2,909; Antique nga may 2,558 Iloilo City nga may 1,054; Bacolod City nga may 915; Capiz nga may 912; Aklan nga may 780; kag Guimaras nga may 317.
Kabug-usan naman nga 82 ang mga napatay bangud sa nasambit nga balatian sa rehiyon.
