By: Ej Arboleda | December 6, 2022
Naglab-ot sa kapin P5 milyon nga balor sang alahas, cash kag P359,000 nga balor sang cellhone unit ang nataban kawatan sa sulod sang Gaisano Mall sa Balasan, Iloilo.
Suno sa Balasan Municipal Police Station, nakabaton ini sang tawag gikan sa HR sa nasambit nga mall nga ginsulod sang kawatan ang establisyemento.
Dugang pa sang otoridad nga nakuha sang mga suspetsado ang vault sang F&C Jewerly nga may yara sang unod nga P36,000 pesos nga cash kag 964 ka bilog nga mga alahas.
Nataban man sang mga kawatan ang 24 ka Vivo units kag 9 ka Samsung units sa isa ka baligyaan sang mga cellphone.
Ginapatihan sang otoridad nga nag-agi sa fire exit ang mga suspetsado.
Sa karon, nagapadayon ang imbestigasyon sang Balasan PNP sa nagluntad nga insidente.
