By: Ej Arboleda | December 7, 2022
Padayon ang pagsaka sang numero sa kaso sang human immunodeficiency virus/acquired immunodeficiency syndrome (HIV/AIDS) sa probinsya sang Iloilo.
Base sa datos sang Iloilo Provincial Health Office (IPHO) sumugod sang bulan sang Enero tubtob Setyembre subong nga tuig may yara sang nabalhag nga 210 ka mga kaso kag 28 naman ang napatay.
Suno sa IPHO nga ang banwa sang Pavia ang pinakamadamo nga kaso sang HIV/AIDS nga may yara sang 18 kag ginsundan ini sang banwa sang Oton nga may 15.
Dugang pa sang IPHO nga ang pinaka-apektado nga mga edad yara sa 25 tubtob 34 anyos nga may yara sang 113 nga kaso, ginsundan sang 15 tubtob 24 nga may 48; 35 tubtob 49 nga may 44 kag 50 anyos pataas nga may yara sang lima ka kaso.
Nahibaluan nga sa numero nga may kaso sang nasambitan nga sakit, may yara sang 201 ka mga lalaki ang positibo sa HIV kag 9 naman ang babayi.
